F.
Za Thang
Arthin tuh
Hlanlio Pi
le Pu dirhmun ka hngal set lo nain ka ruahdamh mi cu “ArthinTuh” hi a thi deng
tiah lungdong in thawlawng hngah deuhmi sinah langhter mi zaanriah deuh a si
rua ka ti. Tuchan ahcun Arthin tuhnak ah
Vok deuh thah a si caah “Vokthin Tuh” ti hmanh in thlen phu a si cang.
A zawmi nak in a dammi chungkhat
rualchan kan i miak deuh hoi. Zeicahtiah a eimi cu a dammi kan si. Mizaw caah
sivai hramhnak le tangka te an pek chih hnga maw ti mingiat ka hmang pah i zei
hlei dang um dawh a si tawn lo. Ramdang kal hnu ko ahhin a lang in Arthin rak
tuh a tam khun. Na Pu/Pi sizung ah a um e tiah thawngthanh zongah a dam ko lai
dahfawh, thlacamnak in kan bawmh lengmang ko ti a si. A thaw lawng kan zoh cang
vun ti vial ah khin ..A nih sinah tangka rak hlam zokzok uh law Arthin kan rak
tuh an ti. Arthin or Vokthin i tuh ti lo in Pathian sin thlacamnak he sivai
caah le sizung umnak caah tiin i bawm hna u sih law ti ka ruat tawn. Sathin hi
laimi caah upa savo a thaw leikap ah ruah a si. Cucaah a zual tuk cangmi kha na
thih cang lai caah hi sathin a thawmi te hi vun dolh law thi ko cang ti he aa
khat in ka hmuh caah a dam a thawng rihmi sin hrimhrim ahcun Arthin tuh hi hman
lo ah a tha.
Arsa thah
Nu le Va
zong Khrihfa thitumnak hi biapi ah chia cang hna u sih (Heb.13:4). Arsa thah lo
fa timi hrimhrim um ti hlah seh. Ramdang kal hnu ko ahhin Fale nungak tlangval
si hnu ah Arsa thah hi ka di a riam kho hrimhrim lo. Thlacamnak i ka tel
hnihkhat ah biachim holhrel zong ka thaw a si tuk lo. Dawtnak umhleng tung lo
ah ngeihchiah Dollar men sawsawh in Pi le Pu sin ah Arsa thah kan
hmang.Phungthluk i “Mah le mah karkalak
cumh” an timi a lo. Khrihfa phungning
loin rak i um a hngal lomi hna zong lung pemter a si. Kan i um ni tuah Khrihfa
thitumnak te he chungkhar ser hna u sih law a Ar taktak Ar khat hnih te thah
zong kha Khrihfa phungning lo i i um ,
caan sau rauh hnuah Vok sumh 6 hna thah len nak in Pathian mithmuh ah a sung
deuh lai ti ka ruat tawn. Vokpa theng sumh 5 fai nakin Voknu sul chuah cia sumh
6 hmanh hakkau deuh le terual deuh kan si ahcun duhdeuh awk a si. Arsa vial ah
aa dawhmi, a kutke himmi, a mithnar tha mi ti fawn i Arsa thahnak le einak caah
Arsa Zu hauh zong um ti hlah seh. Saram nakin kanmah kha dotla si a tha deuh.
Kutdonghrolh
Cheukhat nih
kan i thawh hoi i thitum thlacamnak kutdonghrolh (Ring) thlen dingah Pa lei
lawng kan liamter hna. A phung a si lo. Dawtnak in Pathian le aa pummi hmai ah
kan pek ti biakamnak tuah tung i Pa lei
nih liammi rak si ziar. Voikhat cu kutsih thlacamnak ka tuah hlan ah ka
cawnpiak hna. Nu lei nih an i thawh i , “Pa lei nih pei liampiak phung a si cu”
an ka ti. Ee.. si ko kun seh tiah cawnnak cu kan vun thok. Kutdonghrolh thlen
caan ah “Keimah Suily nih, nangmah
Pengly cu zungzal kan dawt lai tinak caah nangmah cawkmi kutdonghrolh lila
nangmah kan pek” tiah ka ti i a mah he a chungkhat he an mit au meisen chuak
lai bang an ka zoh. An Tapa nih Video chungah mah ti ngaingai cun aa dawh lai
lo an ka ti nain ka duh ve lo.Kei cu aa dawhnak men in thlacam le biakamnak
tuah ka tim lo, a deu kha hrial i a tak kha kan si khawh chung in kan tuah awk
a si ka ti hna. Zaan suimilam 9 ah ka
sin an ra than i tangka Ks. 2,00,000 an rak put. Pa lei kan pekpiak
hna law thaizing a nikhua ah a sining tein biakamnak kan tuahpiak te an ka ti.
Ka thawpi huiiiiii….. tiah ka chuah. A
taktak ahcun pa nih aa hrolh ding khi nu nih liam, nu nih aa hrolh ding caah pa
nih liam a si. Pa kutzung a ngan deuh tawn caah zaangfahnak thinlung a ngeimi
nih a dihmi hnarcheu veve an ti hoi. Mah zong cu a tak a si lo.
Keimah
pumpak hmuhning a si caah ka palhnak um ai kun… Ph. 09400302809 , franciszathang@gmail.com ah biaruah khawh a si.
