Hi web-blog ah a kan lengmi nan dihlak Bawipa nih thluachuah in pe hna seh.
Thuthmun pakhat in vawlei pi a cuan kho cangmi tikcu le caan ah kan nih MIE CHRISTIAN FELLOWSHIP, MALAYSIA zong nih kan umthut dir ning le kan cawlcanghnak te te ramkhip um MIE miphun hna nih rak cuanh khawh ve ding in hi blog hi kan rak tuah . Kan dirhmun a sang, kan fim tinak caah ngeihmi si loin mah le dirhmun te hngalhnak cio ah tuahmi a si. Computer lei thiamnak chuahin hi blog a kan tuahpiaktu Peter Siang Lian Thang cungah lawmhnak kan langhter.
Malaysia ah 2004 in Mie hawikomhnak hi lehlang in rak ngeih a si. Nov 2, 2008 ni in MIE Fellowship min bunh in biakinn kan rak hlang . Cu hnuah CCF cu chuah taak in pumh hram rak thok a si. Cun 2011 January thla thok in MIE Fellowship cu MIE Christian Fellowship ti in rak theln a si. Lai lei Nu le Pa hna hnatlakpinak in le Malaysia um MIE peng hruaitu hna khuakhannak thawng in Rev. F. Za Thang cu 2009 thok in Malaysia ah fanau hna zohkhenh ding ah a rak phan. Kum thum chung kan i hruinak ah Bawipa lamhruainak thawngin kan Fellowship zong a ngandam lengah kan thazaang zong a thawng ngai . Sihmanhsehlaw ramchung ramleng kan cawlcangh ning te te i theihnak ah kan har ngai tawn. Cu caah blog tuah tuah u si law Ramthumnak a lan cangmi le laihlum kan nu le kan pa hna nih hi blog te hin kan cawlcangh ning hun kan thei ve in kan hmu ve hna seh ti duhsak nak te he hi blog cu kan rak tuah. Hi blog hi pumpak ta a si lo. MIE miphun pi nih kan ngeihmi maivan cahmai pakhat a si ve ti kha nan zapi kan in theihter hna. Hi Blog zoh na duh ahcun google search ah deirial-miepeng tiah cafang hme lawng tein tial law web pages a rak chuak lai. Cu hnu cun blog chung ah duh nak zawn te te thim in zoh khawh a si.
Hi blog chung taar awk ah thawngpang asiloah theihtlei te te a tanglei Email address ah hin nan kan kuat khawh a zapi kan taar khawh lo hmanh ah kan miphun pi nih a herh ko ti kan ruahmi te te zoh piak in taar a si lai.
